R Y T M Í S K   T Ó N L I S T

Prófþættir í rytmískri tónlist

Trommusett

Grunnpróf

Á grunnprófi á trommusett skal nemandi leika tvö ólík aðalverk, tvö af fjórum undirbúnum taktbrigðum og eina æfingu. Æfingin skal flutt á sneriltrommu. Aðrir prófþættir eru tækniæfingar, val og óundirbúinn nótnalestur, auk þess sem gefið er fyrir heildarsvip prófsins.

Miða skal við að heildarpróftími á grunnprófi á trommusett fari ekki fram yfir 40 mínútur. Á prófinu skal nemandi flytja að minnsta kosti eitt verk utanbókar samkvæmt prófþætti 1a. Auk þess skal nemandi sýna dæmi um spuna í að minnsta kosti öðru verkinu samkvæmt sama prófþætti. Taktbrigði og undirstöðuæfingar samkvæmt prófþáttum 1b og 3a skulu fluttar utanbókar en nemandi má hafa gefinn rytma útskrifaðan í prófþáttum 3b og 3c. Önnur prófverkefni má leika eftir nótum. Á grunnprófi er fullnægjandi að undirleikur sé leikinn af geisladiski.

Prófþættir eru þessir:

  • Verk (45 einingar alls) í samræmi við kröfur greinanámskrár.
    1. Tvö ólík aðallög (15 einingar hvort).
    2. Taktbrigðalisti. Tvö verkefni af lista fjögurra taktbrigða - valin af prófdómara (15 einingar).
  • Æfing á sneriltrommu (15 einingar) í samræmi við kröfur greinanámskrár.
  • Tækniæfingar (15 einingar) í samræmi við kröfur greinanámskrár. (Prófdómari velur þær undirstöðuæfingar sem skulu fluttar og einnig frá hvorri hendi undirstöðu- og handsetningaræfingar eru leiknar.)
    1. Undirstöðuæfingar samkvæmt námskrá (5 einingar).
    2. Handsetningaræfingar. Önnur af tveimur æfingum, frá hægri eða vinstri hendi - valin af prófdómara (5 einingar).
    3. Samhæfingaræfingar. Önnur af tveimur æfingum - valin af prófdómara (5 einingar).
  • Val (10 einingar). Nemandi velji annað eftirtalinna viðfangsefna:
    1. Leiki frumsamið verk eða eigin útsetningu.
    2. Leiki verk samkvæmt klassískri námskrá af sambærilegri þyngd og önnur prófverkefni.
  • Óundirbúinn nótnalestur (10 einingar).
    1. Viðfangsefni á sneriltrommu (5 einingar).
    2. Viðfangsefni á trommusett (5 einingar).
  • Heildarsvipur (5 einingar).
   Dæmi um prófverkefni á grunnprófi

Í námskrá eru gefin eftirfarandi dæmi um prófverkefni á grunnprófi. Dæmunum er ætlað að skilgreina þyngdarstig prófsins. Fullt eins má velja önnur verkefni af sambærilegri þyngd.

Dæmi um aðallög og lög á safnlista

  • Bye Bye Blackbird (Henderson)
  • C Jam Blues (Ellington)
  • The Girl from Ipanema (Jobim)
  • Tom Hapke: Solo 24, Funk Rock bls. 28 úr: 66 Drum Solos for the Modern Drummer
  • Sperie Karas: Holidays (Solo for Drumset) bls. 80 – Úr: Jazz Drumming in Big Band and Combo
  • Rod Morgenstein / Rick Mattingly: Big Foot bls. 59 – Úr: The Drumset Musician
  • John Riley: School Days bls. 64 – Úr: The Art of Bop Drumming
  • Ron Savage / Casey Scheuerell / The Berklee Faculty: Do it Now – Úr: Berklee Practice Method: Drum Set (Berklee Practice Method)

Dæmi um æfingar – sneriltromma

  • Solo nr. 20 – Úr: Feldstein/ Black: Alfred’s drum method, 1. hefti, bls. 66
  • Alfred Allegro nr. 28 – Úr: Hochreiner: Übungen für kleine Trommel Doblinger
Miðpróf

Á miðprófi á trommusett skal nemandi leika tvö ólík aðalverk, tvö af 14 undirbúnum taktbrigðum og eina æfingu. Æfingin skal flutt á sneriltrommu. Aðrir prófþættir eru upprit, tækniæfingar, val og óundirbúinn nótnalestur, auk þess sem gefið er fyrir heildarsvip prófsins.

Miða skal við að heildarpróftími á miðprófi á trommusett fari ekki fram yfir 50 mínútur. Á prófinu skal nemandi flytja að minnsta kosti eitt verk utanbókar samkvæmt prófþætti 1a. Auk þess skal nemandi sýna dæmi um spuna í að minnsta kosti einu verki samkvæmt sama prófþætti. Taktbrigði og undirstöðuæfingar samkvæmt prófþáttum 1b og 4a skulu flutt utanbókar en nemandi má hafa gefinn rytma útskrifaðan í prófþáttum 4b og 4c.

Prófþættir eru þessir:

  • Verk (36 einingar alls) í samræmi við kröfur greinanámskrár.
    1. Tvö ólík aðallög, a.m.k. annað þeirra flutt með hljómsveit (12 einingar hvort).
    2. Taktbrigðalisti. Tvö verkefni af lista 14 taktbrigða - valin af próf-dómara (12 einingar).
  • Upprit (12 einingar) flutt með upprunalegri upptöku. 
  • Æfing á sneriltrommu (12 einingar) í samræmi við kröfur greinanámskrár.
  • Tækniæfingar (15 einingar) í samræmi við kröfur greinanámskrár. (Prófdómari velur þær undirstöðuæfingar sem skulu fluttar og einnig frá hvorri hendi undirstöðu- og handsetningaræfingar eru leiknar.)
    1. Undirstöðuæfingar samkvæmt námskrá (5 einingar).
    2. Handsetningaræfingar. Ein æfing af þremur, frá hægri eða vinstri hendi - valin af prófdómara (5 einingar).
    3. Samhæfingaræfingar. Ein æfing af þremur - valin af prófdómara (5 einingar).
  • Val (10 einingar). Nemandi velji eitt eftirtalinna viðfangsefna:
    1. Leiki frumsamið verk eða eigin útsetningu.
    2. Leiki verk að eigin vali af sambærilegri þyngd og önnur miðprófsverkefni.
    3. Leiki verk samkvæmt klassískri námskrá af sambærilegri þyngd og önnur prófverkefni.
  • Óundirbúinn nótnalestur (10 einingar).
    1. Viðfangsefni á sneriltrommu (5 einingar).
    2. Viðfangsefni á trommusett (5 einingar).
  • Heildarsvipur (5 einingar).
   Dæmi um prófverkefni á miðprófi

Í námskrá eru gefin eftirfarandi dæmi um prófverkefni á miðprófi. Dæmunum er ætlað að skilgreina þyngdarstig prófsins. Fullt eins má velja önnur verkefni af sambærilegri þyngd.

Dæmi um verk

  • A Night in Tunisia (Gillespie)
  • All the Things You Are (Kern)
  • Birdland (Zawinul)
  • On Green Dolphin Street (Kaper)
  • Feel the Jazz (Karas) – úr: Jazz Drumset Solos, Seven Contemporary Pieces, útg. Hal Leonard
  • Satch & Diz (Riley) (undirleikur af diski) – Úr: The Art of Bop Drumming, útg. Manhattan Music Publications

Dæmi um upprit

  • Max Roach: Blue 7 (Sonny Rollins: Saxophone Colossus) – fyrra trommusóló ca. 4 mín. inn í laginu
  • Harvey Mason: Chameleon (Herbie Hancock: Head Hunters) – spuni í kringum línur og bassa og trommukafli þar á eftir (7:05–8:33 mín.:sek.)

Dæmi um æfingar – sneriltromma

  • Æfing nr. 52 – Úr: Hochreiner: Übungen für kleine Trommel
  • Æfing á bls. 24 – Úr: Whaley/Mooney: Contemporary Patterns of Temporary Music
Framhaldspróf

Á framhaldsprófi á trommusett skal nemandi leika tvö ólík aðalverk, tvö af 32 undirbúnum taktbrigðum og eina æfingu. Æfingin skal flutt á sneriltrommu. Aðrir prófþættir eru upprit, tækniæfingar, val og óundirbúinn nótnalestur, auk þess sem gefið er fyrir heildarsvip prófsins.

Miða skal við að heildarpróftími á framhaldsprófi á trommusett fari ekki fram yfir 60 mínútur. Á prófinu skal nemandi flytja að minnsta kosti eitt verk utanbókar samkvæmt prófþætti 1a. Auk þess skal nemandi sýna dæmi um spuna í að minnsta kosti einu verki samkvæmt sama prófþætti. Taktbrigði og undirstöðuæfingar samkvæmt prófþáttum 1b og 4a skulu flutt utanbókar en nemandi má hafa gefinn rytma útskrifaðan í prófþáttum 4b og 4c. Á framhaldsprófi skal nemandi hafa meðleikara sér til fulltingis.

Prófþættir eru þessir:

  • Verk (36 einingar alls) í samræmi við kröfur greinanámskrár.
    1. Tvö ólík aðallög, flutt með hljómsveit (12 einingar hvort).
    2. Taktbrigðalisti. Tvö verkefni af lista 32 taktbirgða - valin af próf-dómara (12 einingar).
  • Upprit (12 einingar) flutt með upprunalegri upptöku.
  • Æfing á sneriltrommu (12 einingar) í samræmi við kröfur greinanámskrár.
  • Tækniæfingar (15 einingar) í samræmi við kröfur greinanámskrár. (Prófdómari velur þær undirstöðuæfingar sem skulu fluttar og einnig frá hvorri hendi undirstöðu- og handsetningaræfingar eru leiknar.)
    1. Undirstöðuæfingar samkvæmt námskrá (5 einingar).
    2. Handsetningaræfingar. Ein æfing af fjórum, frá hægri eða vinstri hendi - valin af prófdómara (5 einingar).
    3. Samhæfingaræfingar. Ein æfing af fjórum - valin af prófdómara (5 einingar).
  • Val (10 einingar). Nemandi velji eitt eftirtalinna viðfangsefna:
    1. Leiki frumsamið verk eða eigin útsetningu.
    2. Leiki verk að eigin vali af sambærilegri þyngd og önnur framhaldsprófsverkefni.
    3. Leiki verk á annað hljóðfæri úr sömu fjölskyldu og aðalhljóðfæri.
  • Óundirbúinn nótnalestur (10 einingar).
    1. Viðfangsefni á sneriltrommu (5 einingar).
    2. Viðfangsefni á trommusett (5 einingar).
  • Heildarsvipur (5 einingar).
   Dæmi um prófverkefni á framhaldsprófi

Í námskrá eru gefin eftirfarandi dæmi um prófverkefni á framhaldsprófi. Dæmunum er ætlað að skilgreina þyngdarstig prófsins. Fullt eins má velja önnur verkefni af sambærilegri þyngd.

Dæmi um verk

  • Conception (Shearing)
  • Daahoud (Brown)
  • Falling Grace (Swallow)
  • Smatter (Wheeler)
  • St. Alphonzo’s Pancake Breakfast og Father O’Blivion (Zappa)
  • Bill Bruford: When in Doubt, Roll! The Drum Also Waltzes Modern Drummer Publications, Inc.
  • Sperie Karas: Jazz Drumset Solos, Seven Contemporary Pieces Five's the Time Hal Leonard

Dæmi um upprit

  • Elvin Jones – Black Nile (Wayne Shorter: Night Dreamer) – trommusóló og undirleikur (5:04 til enda)
  • Steve Gadd – Nite Sprite (Chick Corea: The Leprechaun) – spuni í kringum línur, trommusóló og undirleikur (3:00 til enda)

Dæmi um æfingar – sneriltromma

  • Etýða nr. 32 – Úr: Cirone, Anthony: Portraits in Rythm Belwin Mills
  • Mitchell Peters: Etýða nr. 22 – Úr: Advance Snare Drum
Tónleikar

Að loknu framhaldsprófi í rytmískri tónlist skal nemandi halda tónleika með u.þ.b. 60 mínútna langri efnisskrá. Alla jafna er gert ráð fyrir að tónleikarnir séu samfelldir, án hlés. Efnistök eru frjáls og engar stílrænar takmarkanir eru gerðar um efnisskrá en áhersla lögð á að hún sé sannfærandi og persónuleg, fjölbreytt og krefjandi. Ekki er heldur gerð krafa um tengingu við efnisskrá undangengins framhaldsprófs en heimilt er að nota hana eða hluta hennar á tónleikunum. Þá er heimilt að nota eigin tónsmíðar á tónleikunum, þær geta verið hluti efnisskrár eða hugsanlega getur efnisskrá alfarið byggst á eigin tónsmíðum. Megináherslan er á að nemandi undirbúi og flytji efnisskrá sem er sannfærandi músíkölsk upplifun frá upphafi til enda. Nemandi ber ábyrgð á framsetningu tónlistarinnar, þ.m.t. samsetningu hljómsveitar og frammistöðu meðleikara. Fyrir frammistöðu á tónleikunum er gefin umsögn en ekki einkunn. Ekki er nauðsynlegt að halda tónleikana á sama skólaári og hljóðfæraprófið fer fram.