Áfangapróf í rytmískri tónlist

Í aðalnámskrá tónlistarskóla (útg. 2000) segir að við lok grunnnáms, miðnáms og framhaldsnáms skuli nemendur þreyta áfangapróf, annars vegar í hljóðfæraleik og hins vegar í tónfræðagreinum. Ekki er nauðsynlegt að nemendur ljúki báðum hlutum áfangaprófs á sama ári, en nemandi getur ekki þreytt miðpróf fyrr en grunnprófi er að fullu lokið. Sömuleiðis þarf að ljúka báðum hlutum miðprófs áður en framhaldspróf er tekið. Til að ljúka framhaldsprófi þarf nemandi að halda sjálfstæða tónleika, auk þess að standast próf í hljóðfæraleik og tónfræðagreinum.

Tilgangur áfangaprófa er fjölþættur. Prófunum er ætlað að skera úr um hvort og að hve miklu leyti nemendur uppfylla ákveðnar samræmdar kröfur um hæfni. Þeim er einnig ætlað að afla upplýsinga um nám og kennslu á vissum sviðum innan tónlistarskóla, meta frammistöðu nemenda í samræmi við markmið og kröfur aðalnámskrár og gera nemendum grein fyrir eigin frammistöðu í hverjum prófþætti. Enn fremur eru prófin lokapróf úr viðkomandi áfanga innan tónlistarskólans.

Skipulagning áfangaprófa

Prófanefnd tónlistarskóla skipuleggur áfangapróf í hljóðfæraleik í samvinnu við viðkomandi tónlistarskóla. Próf geta farið fram hvenær skólaárs sem er að því tilskildu að hæfur prófdómari fáist til starfa. Leitast er við að verða við beiðnum skóla um prófdaga, eftir því sem frekast er kostur, en þar sem lögð er áhersla á það við skipulagningu áfangaprófa að nýta starfskrafta prófdómara sem best, verður stundum að tengja saman próf í fleiri en einum skóla ef um mjög fá próf er að ræða. Þó er miðað við að nemendur þreyti áfangapróf í sínum skólum nema samkomulag verði um annað. 

Sérstaklega um framhaldspróf

Til að ljúka framhaldsprófi tónlistarskóla þurfa nemendur að standast próf í hljóðfæraleik og tónfræðagreinum samkvæmt námskrám, jafnframt því að ljúka tónleikaþætti framhaldsprófsins.

Að loknu framhaldsprófi í hljóðfæraleik í rytmískri tónlist skal nemandi halda tónleika með u.þ.b. 60 mínútna langri efnisskrá. Alla jafna er gert ráð fyrir að tónleikarnir séu samfelldir, án hlés. Efnistök eru frjáls og engar stílrænar takmarkanir eru gerðar um efnisskrá en áhersla lögð á að hún sé sannfærandi og persónuleg, fjölbreytt og krefjandi. Ekki er heldur gerð krafa um tengingu við efnisskrá undangengins framhaldsprófs en heimilt er að nota hana eða hluta hennar á tónleikunum. Þá er heimilt að nota eigin tónsmíðar á tónleikunum, þær geta verið hluti efnisskrár eða hugsanlega getur efnisskrá alfarið byggst á eigin tónsmíðum. Megináherslan er á að nemandi undirbúi og flytji efnisskrá sem er sannfærandi músíkölsk upplifun frá upphafi til enda. Nemandi ber ábyrgð á framsetningu tónlistarinnar, þ.m.t. samsetningu hljómsveitar og frammistöðu meðleikara. Fyrir frammistöðu á tónleikunum er gefin umsögn en ekki einkunn. Ekki er nauðsynlegt að halda tónleikana á sama skólaári og hljóðfæraprófið fer fram.

Prófanefnd leitast við að láta sama prófdómara meta hljóðfæraprófið og tónleikana. 

Birt 16. febrúar 2010